就嚟過年啦喎，有幾多位巴打絲打今年係買咗日本生果做年貨㗎？近日本政府部門「農林水産省」就公布咗2020年全國農林水產出口業績，就算全球疫情肆虐都無阻大家對Made in Japn嘅熱愛，出口金額比上年升咗1.1%。當中香港更係第16年蟬聯榜首，成為日本農林水產品最大出口目的地，睇嚟香港人真係好愛日本。

（圖片截至：2020年の農林水産物・食品の輸出実績）

唔知大家買開啲咩日本嘢呢？係生果、蔬菜、魚生定係得零食咋？根據《香港経済新聞》報導，按出口產品貨種分類下，可以見到香港係多款產品嘅冠軍入口地。當中包括：

豬肉（包括碎肉）、豬肉（不包括碎肉）、雞肉（包括碎肉）、牛奶/部分脫脂牛奶、雞蛋/蛋黃、大米、小麥麵粉、公仔麵、温洲蜜柑、提子（新鮮）、蜜瓜、梨、桃（包括桃駁李）、士多啤梨、柿、椰菜（唔包括小椰菜）、生菜、白蘿蔔，菇（傘菌屬除外）、乾豆（唔包括豆莢）、番薯（生/釀/急凍/乾製）、急凍蔬菜、朱古力糖、葡萄酒、清酒、人造牛油、汽水、大豆油、煙草、人蔘、觀賞魚、蠔（罐頭）、日本鯷（調製）、帆立貝（調製）、鮑魚（調製）、乾貝柱（調製）、海參（調製）、珍珠（天然/養殖）、珊瑚。而其他產品，香港就算唔係排第一都排第二或第三名。

（圖片截至：2020年の農林水産物・食品の輸出実績）

值得一提嘅係，上年日本出口到香港嘅雞蛋同酒精飲品（唔通多咗人借酒消愁？）金額有所上升，香港経済新聞就分析可能因為上年香港實施限聚令禁堂食，所以多咗人自己煮而選擇買安全優質嘅日本雞蛋。

Don Don Donki最近先喺小西灣開咗新分店。

不過其實唔洗統計，大家一向都鐘意日本野㗎啦，依家仲要無得飛日本，促使大家喺香港買爆日本產品藉此一解「思日之愁」。見到Don Don Donki日日都塞爆人，疫情下都可以開完一間又一間分店，就睇到大家對日本產品幾有信心，買生果疏菜通通都日本製造優先，無他嘅，話曬都安全又好食啲。