今日想同大家推廣「香港電影」，初七之後戲院重開未必馬上為奄奄一息嘅香港電影業帶來即時急救，但好多港人應該都對香港電影有一份珍重， 近年電影發展基金撥款資助的好幾套新世代電影都印證香港新一代電影人的潛力同質素，《淪落人》、《G殺》、《金都》全部都有不俗成績，今日推薦新一屆劇情電影計劃得獎作品《遺愛》，除左介紹新銳導演馮智恒，除左講鄭中基零片酬接拍支持，除左講陳漢娜、胡子彤及陶禧玲等新一代演員，更重要係講一個值得推薦探討兩代人悲劇鴻溝的好劇本，推薦的當然仲有香港電影的未來。

香港好在仲有電影發展基金，拍左三屆首部劇情電影計劃作品，為新晉導演提供一條出路，之前經此計劃已經有幾部作品相當出色，並係香港電影金像獎獲得多項提名，如果大家有關注香港電影，相信都認識陳小娟執導的《淪落人》、黃綺琳執導的《金都》、李卓斌執導的《G殺》等等。今回今次有第四屆首部劇情電影計劃得獎作品，由馮智恒執導的《遺愛》係香港疫情最困難的年頭完成，記得當初開拍係2019年的3月份，一路走來香港經歷左一個輪迴，世界經已不再一樣。

新銳導演馮智恒執導第四屆首部劇情電影計劃得獎作品《遺愛》，雖然未肯定今年幾時可以上映，但電影就成功將於3月率先打進日本，係大阪亞洲電影節舉行世界首映 ，道出香港最美殺人犯的傷感故事。 

《遺愛》作為電影發展基金撥款資助的勝出作品，以大約500萬資金下完成拍攝，當中主演的鄭中基以零片酬無條件支持新導演。馮智恒身兼編劇及導演兩職，佢指出《遺愛》係年青人們被遺棄既故事，而中基個角色係好似代表觀眾咁，好全面去睇晒成件事，所以內心係充滿掙扎，想扶年青人一把但係又無能為力。而中基今次好細緻咁演釋到中年人嗰份包伏同遺憾，要演到嗰一種無力感，難度唔低，所以好感謝佢嘅信任！」 

《遺愛》由王日平監製、馮智恒編劇及執導、鄭中基、陳漢娜、胡子彤及新晉演員陶禧玲主演。故事講述二十年前，年輕的母親Elisa（陳漢娜 飾）犯左誤殺罪；二十年後，舉目無親的迪詩（陶禧玲 飾）亦因為藏毒被捕。探員林力輝（鄭中基 飾）係拘捕迪詩後，回憶起十多年前曾處理過的一宗情侶兇殺案－迪詩正是Elisa的遺孤。除了遺憾，林力輝仲可以做什麼？

實際上話《遺愛》會係港產片佳作係言之過早，因為根本無人睇過，不過就算一個新導演，一班新世代演員，一個只得500萬預算的小作，只要有心為香港電影出一份力，我覺得就已經值得支持，比起推薦你去睇咩野賀歲片，香港電影的未來更值得支持，祝新一年電影業可以重新得力，殺出新天。