有返咁上下機齡嘅朋友，相信聽到依家啲後生話《隻狼》、《Dark Souls》難玩，都會笑而不語。講到難玩嘅遊戲，點夠當年細個玩嘅《魔界村》難呢，長期被人打到得返條底褲，邊掉飛刀邊向前沖過關，當年都唔知有幾多人能夠成功爆機呢？

上年CAPCOM就宣布重製《魔界村》系列，喺Swith平台推出《魔界村Resurrection》，將以1985年《魔界村》及1988年《大魔界村》兩部作品為藍本，以全新畫風重現經典，預計2月25日發售。未玩過魔界村嘅朋友都唔使驚，《魔界村Resurrection》將會提供4個唔同難度，令唔同技術水平玩家都可以體驗到遊戲嘅樂趣。

話咁快聽日就正式發售日，各大遊戲媒體試玩後都畀出唔錯嘅分數（我知你哋會話唔可信，但當參考下啦），其中IGN、Metacritic評分更高達約80分。IGN評測認為《魔界村Resurrection》係一隻照顧到唔同玩家嘅遊戲，玩家可以按個人水平而選擇唔同難度。雖然故事啲短，只有7個關卡，但爆機後所解鎖嘅特別關卡增加返唔少可玩性，如果CAPCOM可以將人物移動同攻擊整得更靈活就更好。

（圖片截至：GameSpot）

不過都有遊戲媒體畀差評，GameSpot就認為遊戲人物跑步動作太慢，無辦法跳過敵人，搞到經常因為操作上唔靈活而死，隻GAME似係激嬲玩家多過挑戰玩家。