每逢美國總統出行，都會有個人拎住個被稱為「Nuclear football」嘅黑色公事包同行，入面裝嘅唔係文件，而係核武發射裝置。不過，最近就有多位民主黨議員要求拜登放棄其核武發射權。

根據《FOXNEWS》報導，加州民主黨眾議員Jimmy Panetta喺聯署信表示，如果將核武動用權集中喺一個人身上，會帶嚟風險。更話過往曾有總統用核武要脅其他國家，令官員對總統判斷力產生憂慮，現時已有30多名議員簽署該聯署。Jimmy Panetta認為發射核武之前，應需獲得更多位官員同意，例如美國副總統及眾議院院長。

被稱為「Nuclear football」嘅核武發射裝置。

美國總統獨攬核武發射權可以追溯到二戰後期，由於見識到長崎及廣島原爆威力，當時總統杜魯門下令規定核武發射權由總統一人掌握。

題外話，北韓最高領導人金正恩喺2018年元旦發表演講向美國表示，我粒核彈發射制就係我辦公室張枱上，北韓飛彈射程可以覆蓋美國全境。特朗普就喺Twitter串返佢，我都有粒核彈發射制，仲要比你個粒勁，而且肯定Work。