《小朋友齊打交》呢隻由香港人製作嘅經典遊戲，絕對係大部份男士嘅集體回億。細個嗰陣無依家咁多遊戲玩，又無智能電話，放假通常唔係落公園玩，就係去有電腦嘅朋友屋企打機。相信大家都有經歷過一班同學仔一齊打LF1/2嘅經驗，4對手癡埋一齊好似8手聯彈咁迫喺個鍵盤上面「啪啪啪」，開GAME時又要急急腳打「LF2.NET」解鎖屈機角色，同朋友各自用冰佬同火佬之後一齊合體變冰火佬，太多回憶片段數之不盡。雖然依加睇返隻GAME其實得幾個關卡好快就爆機，但都唔知點解當年可以連續玩幾個鐘都唔悶。

回歸正題，最近本地製作團隊MMM Studio重製咗《小朋友齊打交》3D動作連續劇，目前第一集已經問世，見到經典遊戲場景及角色重現，所有回憶都湧曬出嚟。團隊成員之一嘅動畫設計師羅洛民（Desmond Lo）更喺影片簡介表示「給一群長不大的小朋友」。

第一集以香港中文大學場地做背景，冰佬（Freeze）同火佬（Firen）首先用體術互相較技一下，之後先開始出魔法技，就喺打得火熱嗰陣，邪鬼（Julian）突然出現，其後二人就一齊打邪鬼，未合體變冰火佬就完咗，期待第二集嘅出現！