早喺2018年就傳出《真・三國無雙》真人版電影消息，但由於疫情影響而多次延期，最終預計於今年4月30日上映（Black Widow都係同一日），而官方就喺今日公開電影正式預告片。

電影陣容相當架勢，由《殺人犯》、《大追捕》導演周顯揚執導，搵嚟兩岸三地知名影星出演，包括古天樂（呂布）、 古力娜扎（貂蟬）、林雪（董卓）、劉嘉玲（鑄劍堡堡主）、張建聲（張飛）、姜皓文（張角）、楊祐寧（劉備）、韓庚（關羽）、王凱（曹操）與呂良偉（袁紹）等。

玩過《真・三國無雙》系列遊戲都知，隻GAME最吸引嘅地方就係可以令玩家一騎當千、橫掃千軍，斬兵仔斬到好似割草咁爽。從預告片可以睇到，電影亦還原咗呢一部份，見到啲武將可以1打1000，揮一揮武器就打飛百幾二百個士兵。

近日有微博網友就喺旺角見到電影宣傳廣告板，大部份人都覺得林雪所飾演嘅董卓最神似，大家又點睇？