前日本女團欅坂46成員今泉佑唯，今年1月突然宣布同人氣Youtuber Mahoto奉子成婚。點知Mahoto隨即爆出強迫15歲少女拍淫照醜聞，更被經紀公司炒魷魚，連Youtube Channel都摺埋。事隔近2個月，Mahoto於17日被當地警方正式拘捕。

Mahoto被日本警方拘捕。（圖片來源：スポニチ）

今泉佑唯傳出婚訊後，引起粉絲們一片嘩然，佢未婚夫Mahoto亦被大爆黑歷史，指控佢曾喺2019年對同居女友施暴。更嚴重嘅係，有位15歲少女透過一位名為「KoreKore（コレコレ）」嘅Youtuber揭發Mahoto惡行，聲稱Mahoto從上年11月起強迫佢Send裸照，數量多達30幾張，更恐嚇佢如果講出去就會全開曬所有裸照。

事情曝光後，Mahoto隨即被日本警方帶到警局問話，並承認確實有呢回事，不過因為受害人未解釋清楚事情來龍去脈，所以問完就放咗Mahoto返屋企。期後Mahoto就被公司炒魷魚，Youtube Channel亦被中止。事隔近2個月，當Mahoto以為可以甩身嗰陣，日本警方展開正式拘捕。

據日媒報導，當今泉佑唯知道Mahoto惡行後，曾經一度喊到出唔到聲，更激到要入院，即使經理人公司同朋友多次勤佢離開Mahoto，但睇嚟今泉佑唯最終選擇原諒。另外，據知情人士消息指兩人仍未註冊，現時懷孕7個多月嘅今泉佑唯，預產期喺6月，如果Mahoto被監禁，BB可能一出世就見唔到爸爸。

資料來源：スポニチ