改變世界救救地球有時可以好簡單但一定要有創意，養牛作為全球甲烷溫室氣體主要來源，加州大學戴維斯分校有人搵到方法，只要餵牛牛食添加海藻，就可以將牛隻放屁甲烷排放量減少 50% 以上，原因係海藻可以抑制牛隻消化系統中一種有助於甲烷產生的酶，而且食左海藻添加物的牛唔止環保左，仲健康左同一樣咁好味，拯救世界可以從發掘小節開始，食肉獸今晚可以大雙道理食個靚扒慶祝一下地球有救啦！

全世界一共飼養左大約 10 億隻牛，牛牛牲畜排放的甲烷係世界溫室氣體主要來源之一。最近一篇新研究再度提出證據，只要讓牛隻餵食少量海藻就可以簡單大幅減少佢地的甲烷排放量，且不會影響牛的健康或肉質。現時地球含量最豐富的溫室氣體係二氧化碳，不過甲烷比二氧化碳高 21 倍能力造成全球暖化，現時全球甲烷天然排放來源除左沼澤，最主要來自農業牛隻在消化過程中排放的屁和打的嗝。一直以來為左減少牛牛帶來的溫室氣體，唔少人建議減少養牛、減少食肉，不過加州大學戴維斯分校動物學家 Ermias Kebreab 就嘗試向另一面思考：如果透過飲食改善牛隻的甲烷排放問題可唔可行呢？

2018 年Ermias Kebreab 團隊嘗試係牛隻飲食中添加海藻，實驗進行左 2星期，就發現此舉有效將牛隻甲烷排放量減少 50% 以上，原因係海藻能抑制牛隻消化系統中一種有助於甲烷產生的酶。而最新發表的研究中，團隊將實驗由2 週擴展至 5 個月，每日利用專門設備測試牛隻呼吸出來的甲烷含量 4 次，想了解持續給牛隻餵食紅海藻（Asparagopsis）的話，牛胃中產生甲烷的微生物是否可能進化成可抵抗海藻功效。實驗結果表明，每日飲食中食 80 克海藻的牛隻甲烷排放量，比對照組牛隻少了 82%，但體重維持不變，證明持續餵食海藻的話真係可以持續降低甲烷在消化過程中生成。而味道方面，添加海藻飲食的牛隻肉質或牛奶品質都沒有明顯變化。

為牛牛餵食海藻好處仲好多，另一個重要的發現係補充新型飲食的牛隻將食物轉化為體重的效率，比傳統飲食的牛隻高出 20%，呢種好處仲可以幫助降低農民生產成本，團隊計算出如果養育 1,000 隻肉牛，改餵新型高能量飲食的話，可以將飼料成本由原先87,320 美元降低至 40,320 美元，具體取決於牛隻食左幾多海藻。

改變世界帶來美好未來，其實可以好簡單。不過雖然暫時證據支持餵食海藻的多種優點，但目前依然好難大規模全球養殖呢種特殊海藻，科學家首先需要開發水產養殖技術以大規模生產；此外，仲要美國食品藥物管理局（FDA）批准先可以將海藻作為肉牛的飼料補充品。大家聽完呢個消息係咪即時降低食牛肉的罪疚感，好想大食一餐！