本地漫畫家Felix Ip（葉偉青）憑豐富想像力創作出《香港重機》系列，將充滿「本土情懷」嘅事物化身成各式各樣嘅機械人。最近佢就運用呢份奇思妙想創作咗一系列「香港機動戰士」畫作，原來電車可以變渣古、安全島燈箱可以變高達、連天星小輪都可以變木馬號！

可以見到Felix Ip將西瓜波、天星小輪、紅VAN、的士、中巴、電單、舊郵筒、安全島燈箱等等充滿「港味」嘅元素，融入到大家所熟悉嘅機動戰士入面，玩味十足，不過如果可以實體化整成3D模型相信會仲正。

據了解，自細就鍾情於動漫嘅Felix Ip，畢業於理工大學設計系，曾從事平面設計多年，其後又喺電子遊戲行業做過美術指導，同時又參與過多部知名動畫電影製作。喺2011年將香港作家喬靖夫嘅武俠小說《武道狂之詩》改編成長篇漫畫後，就從此踏足漫畫界，成為自由創作人。

資料來源：Facebook@Felix IP 葉偉青、Instagram@felixipart