據日本產經新聞報導，去年嘅疫情令全球多國大眾都係強制留家，結果令日本漫畫市場急增23%，達到6126億日元，成為自1978年有紀錄以來最大規模。但同時盜版漫畫網站流量亦大增，結果就係令日本動漫界去年損失超過2000億日元。比起三年前惡名昭著嘅「漫畫村」被取締前更為嚴重。

已被停運的漫畫村網站

去年《鬼滅之刃》大熱，加上疫情令大家無法出街，都令日本漫畫市場份額急速增大，但同時盜版漫畫網嘅流量就增長得更快。據日本出版商及電訊商組成嘅反盜版漫畫網站組織「ABJ」公佈，單論瀏覽量最多嘅三大盜版漫畫網，其每月訪問數由2020年1月嘅1,200萬左右，急升至2020年12月嘅1億2000萬左右，升幅幾乎為十倍，估計令日本漫畫產業去年損失2,114億日元。而以上數字甚至係未計容許下載落黎再睇嘅盜版漫畫網，所以ABJ估計，盜版漫畫網造成嘅損失，會比當年「漫畫村」造成嘅 (3,200億日元) 更多。

瀏覽量最高嘅三大盜版漫畫網過去一年每月合計流量

圖片：產經新聞

講起盜版漫畫網嘅來源，大家可能下意識就會向北邊嘅某個大國望去，但據ABJ指，目前大部份盜版漫畫網都係使用越南作為「根據地」，所以理論上係位於越南。而即使日本政府要求外國政府協助，但由於盜版漫畫網站對於其他國家黎講並無造成任何損失，所以各國嘅反應都非常緩慢。

出版社亦試圖自行處理問題，據報出版《鬼滅之刃》嘅集英社每個月都會向盜版網站，搜索網站，YouTube，Facebook等提交10萬個刪除申請，但集英社嘅知識產權部門都講到明，「你今日刪除20個盜版漫畫網、好快又會有另外20個出現」。

圖片：《少年Jump》

日本漫畫對於唔少香港人黎講都係不可或缺嘅愛好，而大家平時用咩方法睇漫畫大家心知肚明。或者我哋都應該用一個正當手法，去支持呢個帶畀我哋多年娛樂甚至感動嘅產業、尊重創作者嘅心力。