去年疫情影響全球電影業，除咗拍唔到戲，院線亦因為封城停業、人流限制、發行延期等種種原因受到重創，發行商如Warner Bros亦嘗試將電影直接放上串流平台尋求出路，結果就被如Christopher Nolan等「大銀幕支持者」抨擊。正當近來疫苗出現，大家都預期疫情減退、電影業可以「重回正軌」嘅時候，Netflix共同CEO Ted Sarandos近日接受訪問時就公開「唱淡」院線，認為有啲嘢冇咗就係冇咗，甚至提出Netflix當年「就冇諗過要救DVD出租事業」。

Ted Sarandos

圖片：Flickr

Ted Sarandos日前接受《KCRW》訪問，當中就講到Netflix自家製電影嘅上映策略 (即係只限Netflix播、戲院同Netflix同時播、又或戲院播一輪先到Netflix播)，而Ted Sarandos嘅回答就係：「我唔認為想睇好戲嘅觀眾會Care套戲係喺邊到 (院線或者屋企) 睇，佢哋淨係會諗套戲係咪我想睇。」所以對佢黎講，內容先係最重要，而Netflix串流係主打，戲院上映就只係令套戲可以被「想去戲院睇嘅人」睇到嘅渠道。

佢補充：「你必須要跟隨觀眾。如果觀眾唔去戲院而係留喺屋企睇，你就要去配合。去戲院睇戲可能會變得罕見。」而作為電影創作者，面對呢個轉變就只有「進化或死亡」嘅選擇。佢甚至直言「如果你嘅首要目標係拯救一項事業，你就死硬」。佢提出當年Netflix由出租DVD業務轉型做串流時，「我哋從來冇花一分鐘去試圖挽救DVD業務，我哋一心就係想走向串流，而如果我哋花一分心機時間去救DVD業務，就即係我哋少咗一分心機時間去做串流。跟隨你的顧客相當重要，當年見到佢發生緊就要全力以赴。」

圖片：Nuovo Cinema Paradiso (星光伴我心) on IMDB

簡而言之就係，Ted Sarandos認為觀眾唔Care套戲喺邊到睇，只係Care套戲好唔好睇，而Netflix就係為觀眾提供好嘅電影，以及「出街睇又得、屋企睇又得」嘅選擇。假如觀眾真係唔再入場睇戲，佢哋亦唔會強逼觀眾一定要入場先睇到。