Marvel拍戲好睇大家都知，但估唔到嘅係佢哋拍劇嘅功力同樣深厚，早前播完嘅《WandaVision》及目前播緊嘅《The Falcon and The Winter Soldier》唔單止劇情有趣、鋪排有心思，更加為幾位於電影中未受重視嘅角色加強層次，同時又補完甚至開拓Marvel電影宇宙，一雞幾味之餘仲要好好食！而準備於6月11日播放、由Tom Hiddleston主演嘅《Loki》亦公開最新預告！

最新預告出現大量新畫面，同時亦一改近年流行嘅「睇完都唔知講乜」預告慣例，頗為直白地帶出故事主線。以目前兩條預告中得知，《Loki》劇集將會講述復仇者聯盟於《Avengers: End Game》中回到2014年紐約奪取宇宙魔方但失敗，宇宙魔方意外落到Loki手中，結果「打破現實 (Broke Reality) 」造成「時間線分支」，Loki就被「Temporal Variance Authority」捉去「修補時間線」。

預告中TVA特務Mobius (Owen Wilson飾演) 亦以「Variant」稱呼劇集中呢位Loki，據估計呢個係MCU嘅新術語，意指由於時間線分離而出現嘅人物——即係2014年冇拎到宇宙魔方 (後來被Thanos殺死) 嗰個Loki係「真Loki」、而拎走咗嘅就係「Variant」。

兩者結合，可以預計Marvel有意用《Loki》為MCU正式帶入「平行宇宙」觀念，而萬一呢個「Varient Loki」能夠進入「主時間線」，咁喺Marvel主線劇情又會有返Loki呢個角色，再誇張啲講就係所有死咗嘅角都可以用呢個方法「翻生」——不過想當日《WandaVision》出現《X-Men》版快銀時，大家都係咁估，結果就被Marvel大大巴車落塊面到，所以一切都係等到6月11日劇集播出之後先知啦。