ACG嘅嘢，點都有啲大乜乜主義、大物物主義㗎喇，作者係美國人，就梗係畫番英雄係美國人，日本人亦一定話班英雄係來自日本。鬼叫呢兩個國家係ACG（再加埋特攝）強國咩，咪變成所有救世者、異能人、機械人都係嚟自美帝同東瀛囉，冇計啦，港漫都畫過唔少本土救世英雄㗎，不過衝唔出國際之嘛。

而美系英雄crossover互鬥，大家睇唔少；日系英雄雖然團結啲，但都間唔中有打過，之不過美日兩派英雄開片，機會就似乎微乎其微，可能要靠同人去補完先能成事。就好似巴西插畫師Francisco Silva Mauriz畫嘅呢輯作品咁，將兩派英雄分類咁去打，異能人對異能人，機械人對番機械人，有隻揪又有群毆，Hulkbuster太勁咩？咪出動成隊電腦警察去圍攻佢囉！

不過從Francisco揀嚟畫嘅日本英雄（大部分嚟自特攝）睇嚟，佢應該係70或80後，所以唔見有路飛或鳴門對復仇者聯盟之類。其實近年荷里活都經常買日本動漫版權嚟拍電影㗎喇，呢種crossover堅有得諗喎，只係怕日本仔唔容易批准人哋咁玩佢哋啲角色啫。