世界各地唔少古老洞穴都發現過古人類壁畫，當中有啲穴室更迂回曲折深入地底，伸手不見五指，絕對唔會係一個好嘅創作地方。咁點解無光又難行，古人仲要選擇走入洞穴畫畫？根據一項最新研究推斷，古人可能因為洞穴缺氧環境獲得迷幻感，從而激發壁畫創作靈感。

根據一項刊登喺《The Journal of Archaeology, Consciousness and Culture》嘅研究，當人體血氧濃度低至某個水平，大腦中就會釋放多巴胺導致產生幻覺及欣快感。研究團隊認為，大約14,000至40,000年前，古人類拎住火把走入洞穴深處探險，由於穴內本身氧氣就唔多，加上燃燒火把令氧氣含量降得更低，一班古人喺缺氧狀態下展開一場「迷幻之旅」，從而激發出壁畫藝術創作嘅諗法。

為驗證假設，團隊更透過模擬實驗研究火把對封閉空間氧氣濃度影響。實驗結果顯示，喺一個只有一個入口嘅洞穴燃燒火把，短短15分鐘穴內氧氣濃度就會降至18%以下，比起正常環境嘅21%少。而且，由於氧氣比二氧化碳輕，所以燒燃所產生嘅二氧化碳會令氧氣「推」到穴室頂部，人所吸到嘅氧氣將會更少。

資料來源：cnet、The Journal of Archaeology, Consciousness and Culture