如果無Steve Jobs嘅出現，大家都可能無手上用緊嘅iPhone，當年由佢主持嘅Apple發布會，每次都能夠展示出驚人新產品，即使已經離開多年，但佢嘅說話同精神仍然深深影響住後世。最近就有日本網友喺石川縣發現一尊非常似Steve Jobs嘅坐禪石像，隨即引起網友熱烈討論。

どこの高僧かとおもったら石化させられたジョブズだった pic.twitter.com/ziRulCviJj

— 岸本元 (@bowwowolf) April 12, 2021

從相中可以見到呢尊戴住眼鏡嘅石像似西方人，但由於佛陀係印度人，所以唔排除製作者係以印度覺者為藍本，不過一般人見到高領衫同戴眼鏡造型，第一時間就會諗起Apple創辦人之一Steve Jobs。

據了解，呢尊石像位於石川縣「櫛比の庄 禅の里交流館」門前，館內展出日本佛教曹洞宗大量歷史資料，充滿歷史人文氣息，相信係一個散心靜修好地方。有日本記者打去當地政府詢問，對方就表示呢尊石像由當地一間石像店耗時半年製造，並無模仿任何人，只係單純一尊開悟者石像，不過唔排除人有相似嘅可能。網友們就留言表示想知幾錢，自己都想要返個，亦有人擔心會唔會有果粉們湧去「朝聖」。

資料來源：livedoor、facebook@禅の里交流館