近年網購巨頭Amazon積極開拓實體市場，除咗不停開無人超市，最近佢哋就踩過界撈埋開髮廊，喺倫敦東區Spitalfields開設首間Amazon Salon，並提供擴增實境（AR）技術畀客人預先試造型。

Amazon Salon分為兩層，共有1,500平方呎。每個座位都有一部Fire Tablet平板電腦，客人可以透過AR技術模擬髮型及染色效果，等髮型師可以跟住嚟剪，部平板同時可以畀客人剪緊頭髮嗰陣拎嚟玩。

店內另有展示出各種護髮及美容產品，客人可以透過最新「指向與學習（point-and-learn）」技術，用手指指向有興趣嘅產品，螢幕就出現該產品更多資料及使用方法。如果想買，只要掃一掃架上嘅QR Code就會引導到相關Amazon頁面。

不過想試嘅人就要等下啦，目前Salon只對Amazon員工開放，幾個星期後先開放公眾預約，喺英國住嘅朋友不妨去體驗一下。

資料來源：amazon blog