除咗性功能問題，男士最怕就係禿頭。不過由於文化差異，禿頭男喺外國被視為更有男人味、聰明、值得信賴、成功人士。最近外國一間防掉髮科研公司透過社交軟件Tinder做咗項研究，發現雖然女士較喜歡有頭髮嘅男人，但禿頭男更男士歡迎，同時年齡較大嘅女士較容易接受禿頭，反映禿頭男喺外國同志社群較受青睞，可見無頭髮又唔一定要無晒自信嘅。

（圖片截自：myspring）

德國防掉髮科研公司Myspring最近展開一項有關禿頭男士研究，訪問咗2,500名男女，有7成人都認為禿頭男士擁有聰明、值得信賴、更有男人味、成功人士等等多項正面特質。

其後佢哋用同一位男士，分別以有頭髮造型同禿頭造型去玩Tinder，兩個帳號每日都會Like 100位不同性別及年齡層用戶，展開為期10日網絡約會研究。結果發現女士們較喜歡有頭髮男士，有頭髮造型帳號共獲得394個成功配對，而禿頭造型就得365個配對。當中有趣嘅地方係禿頭造型帳號365個成功配對入面，大約9成人（335人）都係男士，反映禿頭男喺同志社群入面較受青睞。