想買PS5嘅朋友可能要等到出年啦！據《Bloomberg》報導，Sony向分析師表示，由於全球晶片短缺，預料PS5缺貨問題將會持續到2022年，同時未知幾時可以恢復正常供應。

（圖片截自：《鹿鼎記》）

《Bloomberg》引述消息人士透露，日前Sony公布完財報後，喺一場簡報會向分析師表示，PS5供應難以應付市場強勁需求，從上年11月推出至今一直面臨缺貨問題，部分原因係出自晶片短缺。Sony CFO十時裕樹於會議上表示：「我唔認為今年市場需求會下趺，但即使我哋買入更多設備增加產能，供應仍然無法滿足需求。」

由於近半年全球晶片短缺問題嚴峻，加上疫情導致宅經濟興起，除咗搞到PS5供不應求，更影響埋電腦顯示卡、手機、汽車生產。Sony競爭對手任天堂亦喺上個星期表示，今年產量可能會受晶片短缺影響。

資料來源：bloomberg