由荷里活外國記者協會（HFPA）主辦、地位僅次於奧斯卡金像獎嘅電影界盛事金球獎（Golden Globe Awards），早前被揭會內87名成員一位非裔人士都冇，而被批評缺乏「種族多元」，慘遭荷里活圈內人杯葛。著名演員Tom Cruise就退回三座金球獎以示不滿、Netflix同Amazon公開表態抵制，美國NBC電視台亦宣布唔再轉播2022年金球獎頒獎禮，令歷史悠久嘅金球獎陷入危機。

早於今年2月，就有消息指HFPA入面一個非裔成員都冇，而且前主席Philip Berk被爆私下講過「BLM運動係種族仇恨運動」等言論，引起圈內人極度不滿。「Black Widow（黑寡婦）」演員Scarlett Johansson就大爆曾經被HFPA成員騷擾，表示HFPA就係Harvey Weinstein（前HFPA成員、因性騷擾女演員入獄）呢種人嘅庇護所，所以自己咁多年都唔願意參加金球獎活動。

其後「The Hulk（變形俠醫）」演員Mark Ruffalo、Neftlix行政總裁Ted Sarandos，以及Amazon Studios負責人Jennifer Salke亦先後發聲譴責HFPA，批評佢哋缺乏透明度及多元性，有性別及種族歧視問題，呼籲大家唔好同HFPA合作。

隨著HFPA風波愈演愈烈，一向負責轉播金球獎頒獎禮嘅NBC電視台發聲明表示：「我哋相信HFPA正致力改革緊，不過咁大規模嘅改革需要時間同精力，我哋認為HFPA要啲時間先可以做好，所以NBC唔會轉播2022年金球獎。」換言之HFPA必須盡快改革，或者搵過第二間電視台轉播，否則都唔知出年頒獎禮點算。NBC發表聲明同時，Tom Cruise亦宣布加入呢場抵制活動，分別將三座金球獎還回畀HFPA。至於出年會唔會冇金球獎睇？就要睇下HFPA會點處理今次風波。

資料來源：variety、deadline