因為吉卜力工作室製作人鈴木敏夫早前接受訪問時指，《EVA》系列導演庵野秀明曾經有意重製宮宮崎駿嘅經典動畫《風之谷》，搞到日本坊間出現「庵野秀明下一部作品係重製國民級動畫電影」嘅傳聞。不過庵野秀明所創嘅「Khara」於昨日就發表公告打破傳聞，指一切都係Fake News。

Khara於5日16日於官網發出公告，第一句就講到明「近日有關庵野秀明下一部作品計劃嘅報導都唔係事實」，更直指「無論係之前定依家，Khara任何人都冇接受到任何雜誌或網上媒體嘅訪問」，之後補多句「如果我哋公司嘅人真係有接受正式訪問，就會喺官網、社交網站等地方公佈」。簡單啲黎講，就即係話「庵野秀明重製《風之谷》」係佢哋都唔知喺邊傳出黎嘅Fake News。

庵野秀明對上一部作品，係3月上映、截至5月初日本本土票房達83億Yen嘅《新．福音戰士劇場版：終》，而下一部作品，就係預計2023年上映嘅《幪面超人》50週年紀念作《真．幪面超人》。