根據科學期刊《Scientific Reports》一項研究報告，研究人員喺首爾漢江驗出河水含有高濃度「偉哥」以及其他陽痿治療藥物，愈接近遍佈娛樂場所嘅江南地區，檢出嘅濃度就愈高。而且每逢到咗星期五及周末，河水「偉哥」濃度亦會急劇增加。

首爾市立大學環境工程學系教授金鉉旭（김현욱），帶領研究團隊抽取首爾市江北地區中浪川以及江南地區炭川一帶河水，經過為期一周嘅水質成份監測，結果發現水中含有高濃度偉哥及其他陽痿治療藥物成分。當中遍佈娛樂場所嘅江南地區，所驗出嘅「偉哥」平均濃度更高達88ng/L，比起江北地區嘅62ng/L更高。而且每逢到咗星期五及周末，兩地附近河水偉哥濃度更會急劇增加。

金鉉旭教授就認為，研究應該同兩地娛樂場所有關，唔排除商人向顧客提供非法壯陽藥物，同時污水處理廠又過濾唔晒咁高濃厚嘅「偉哥」，所以導致咁嘅結果。教授就警告，過去漢江都冇驗出過陽痿治療藥物，恐怕有關成份已經無聲無息咁影響緊生態系統。

資料來源：Scientific Reports、insider、news1