唔知大家掛唔掛住有得去旅行嘅日子呢？過往每逢放假都可以去旅行散下心充下電，可惜隨著疫情出現，全球旅遊業停擺，依家就連去郊外呼吸下新鮮空氣都要同人迫餐死，相信大家都好希望生活能夠「恢復正常」。

有鑑於歐洲多國疫情放緩，部分國家陸續解除限制，餐廳、博物館以及戲院等公共設施重開。近日歐盟亦決定「鬆綁」旅遊限制，容許已接種「歐盟認可」疫苗旅客入境，預料有助振興當地旅遊業，大家亦有機會去歐遊。

當「恢復正常」嗰陣，大家最想去邊到旅行呢？

據路透社報導，目前歐盟認可疫苗包括輝瑞-BioNTech、Moderna、牛津-阿斯利康、Johnson＆Johnson（強生），以及世衛「緊急使用清單」上嘅疫苗（當中包括中國國藥疫苗，但冇科興）。旅客只需要喺入境前至少14日接種第二劑「歐盟認可」疫苗，即可入境歐洲旅行，至於使唔使隔離就交由各國自行決定。