日本女星新垣結衣憑出演日劇《逃避雖可恥但有用》深受粉絲喜愛，更被網友封為「國民老婆」，點知日前突然宣布同劇中拍檔星野源結婚，隨即引起一遍哀號。有日本IT企業社長就帶頭放「療傷假」，宣布所有「受傷」嘅員工都可以一齊放假，真正嘅共渡時艱。

は？ガッキー結婚？おめでとうございます。明日仕事休みます。

— 米村歩@日本一残業の少ないIT企業社長 (@yonemura2006) May 19, 2021

綜合日媒報導，呢間日本IT企業名為「AXIA」，社長米村步一向以優良員工福利聞名，從來唔使員工OT。新垣結衣婚訊傳出當日，佢就喺Twitter表示：「吓？結衣BB結婚？恭喜，我聽日要請假。」隔咗唔夠一個鐘，佢就對員工發出「休假通知」公告，表示如果有員工因為新垣結衣結婚而無法專心工作，可以特別請假一日。

これはマジで無理なやつでした。。。 pic.twitter.com/CQdZoRl2jP

— 米村歩@日本一残業の少ないIT企業社長 (@yonemura2006) May 19, 2021

咁體諒下屬嘅做法當然引起日媒爭相報導，米村步就向記者表示，佢讀緊高中嗰陣就已經喺電視廣告見過結衣BB，從此就不能自拔，出通告當刻其實冇諗太多嘢，只係覺得結衣粉絲應該會無心工作。被問到當日有幾多人請假，米村步就話確實有幾位員工請假，但由於請假唔使表明理由，所以唔知佢哋係咪真係因為「失戀」而請假。

資料來源：ねとらぼ、ABEMAヒルズ