近日《F9狂野時速》演員John Cena接受台媒訪問時，聲稱台灣係第一個睇到套戲嘅「國家」，隨即引起中國網友不滿。眼見事情愈演愈烈，恐怕影響電影票房，John Cena喺今日凌晨就用普通話拍片認錯，表示很很很很很抱歉，強調自己好尊重同愛中國人。一向「You Can't See Me」嘅John Cena今次終於被中國網友發現，唔知各位中國網友接唔接受佢嘅道歉呢？如果連《F9狂野時速》都抵制埋，都唔知仲有咩西片可以睇。

（圖片截自：微博）

日前John Cena接受台灣電視台訪問時表示「台灣係第一個睇到《F9狂野時速》嘅國家」，隨即被中國網友截圖放上微博公審，引起廣泛爭議。有網友就表示John Cena學咗咁耐中文想開拓中國市場，點知今次一句說話就玩完。

（圖片截自：JohnCena微博）

John Cena眼見事情愈演愈烈，喺今日凌晨就用普通話拍片道歉，表示「你好中國，我是趙喜娜（佢中國譯名嚟）。我做很多很多很多採訪，所以在一個採訪，我有一個錯誤，我必須說現在就是很很很很很很重要，我愛更尊重中國跟中國人，我很很很很很抱歉，對我的錯誤，對不起對不起我很抱歉，你必須了解，我很愛很尊重中國跟中國人，不好意思。」簡單嚟講，即係佢話自己因為做太多訪問，所以唔小心「犯錯」，強調自己好愛同尊重中國人。

對於John Cena嘅道歉，大部份中國網友都唔收貨，認為佢打算矇混過關，根本冇講清楚自己錯喺邊到，並唔係真心對中國人道歉，只係睇在人民幣份上而道歉，兩面不是人。有網友就叫John Cena唔好咁多廢話，直接用普通話講出「台灣是中國一部分」就原諒佢。不過都有中立態度嘅網友認為John Cena十年前就學緊中文，覺得佢真心愛國，只不過講錯嘢就要付出代價。

截止5月24日，《F9狂野時速》已於中國大收9.61億人民幣票房，未知今次John Cena嘅「政治風波」會唔會影響到往後票房，但如果中國網友再發起抵制運動，都唔知仲有咩西片可以睇。

資料來源：微博