目前USB-C喺手機界已經相當普及，不過對於大部份手提電腦用家嚟講，最煩莫過於嗰嚿又大又重嘅火牛，不過大家好快就唔使咁煩惱。最近USB-IF（USB Implementers Forum）公布一套USB-C新規格，將接口功率從100W提升到240W，意味著未來大部份手提電腦都能夠直接透過USB-C充電。

目前USB-C介面嘅USB PD充電協議最高只支援100W（20V / 5A）充電，對大部份文書手提腦電腦已經相當夠用，但對於閒閒地就用上150W以上嘅高功耗手提電腦就絕對唔夠，就算部機有得插USB-C充電，都無法以最大功率情況下充電（即係充得慢），所以現時好多手提電腦都會跟埋一個又大又重嘅火牛同充電頭。

各位手提電腦用家，將來可能唔使再見到呢嚿火牛。

最近USB-IF公布嘅USB-C 2.1規格，就將USB-C升級支援240W充電功率，意味著將來大部份手提電腦用USB-C就有足夠高嘅充電功率，唔使再拎著嚿火牛出街，甚至有部份螢幕都能夠透過USB-C供電。不過要達到240W充電功率，代表條USB-C線要承受到5A電流及48V電壓，同時部手提電腦都要支援48V咁高電壓嘅輸入，充電頭亦要支援高電壓輸出。講到尾都係要睇下各大廠商會唔會製作相關產品，不過都值得大家期待一下。

資料來源：theverge、USB-IF