即使梅姐離開大家將近18個年頭，其天籟歌聲至今仍為香港人念念不忘。全因當年一個承諾，安樂電影公司決定開拍傳記電影《梅艷芳》，以此緬懷一代天后梅艷芳。最近電影曝光首條預告片，重現梅姐最後一次紅館演出，道出一句扣人心弦說話：「我將我自己嫁咗畀你哋、嫁咗畀音樂、嫁咗畀舞台。」

今部電影由《寒戰》系列導演梁樂民執導，短短42秒嘅預告片聚焦喺梅姐告別演唱會，鏡頭從紅館外慢慢拉近，身穿白色婚紗嘅梅姐走上舞台，道出一句「我將我自己嫁咗畀你哋、嫁咗畀音樂、嫁咗畀舞台。」接著響起《夕陽之歌》前奏。

據安樂電影公司江志強先生憶述，當年梅姐希望江生可以幫佢拍一套留名後世嘅電影，所以江生同張藝謀導演就特登喺《十面埋伏》為梅姐設計咗一個角色，可惜電影未開拍，梅姐就永遠離開大家。咁多年嚟江生一直銘記在心，為咗一圓梅姐生前遺願，故此開拍傳記電影《梅艷芳》。