唔知大家仲記唔記得以前Windows個嗰鬼死咁大聲嘅開機音效呢？雖然聽落確實幾醒神同有儀式感，不過有啲情況就會搞到非常尷尬。尤其當年會趁屋企人瞓晒覺而偷打機嘅朋友，如果唔記得熄喇叭，一啪著粒開機制就要有「藤條炆豬肉」嘅心理準備。而返工遲到嘅朋友，當你以為可以偷偷地鼠返埋位嗰陣，分分鐘一個開機音效就出賣你。幸好Microsoft從Windows 8開始取消默認開啟開機音效，從而減少好多不必要嘅尷尬。近日Microsoft前員工就透露，原來佢都係因為受開機音效困擾，先決定取消音效。

近日Windows用戶體驗團隊前總監Jensen Harris，喺佢個人Youtube頻道透露點解會取消Windows開機音效。據了解，從Windows 3.1已經有開機音效，經歷N代改版之後，Microsoft最終喺Windows 8取消默認開啟開機音效。Jensen Harris解釋，由於當年佢屋企多咗個新成員，怕夜晚用手提電腦嗰陣會嘈醒BB同埋老婆，繼而萌生取消開機音效嘅想法。佢認為電腦設計成一個最私人同私密嘅空間，無論朝早定係夜晚都好，開機音效都係一個好糟糕嘅功能，於是就叫同事刪除音效。

所以大家從Windows 8打後就好少再聽到有開機音效呢樣野，我特登搵咗條歷年開機音效片畀大家回味一下，唔知大家第一次用電腦嗰陣又係咩版本嘅Windows呢？

資料來源：Youtube@Jensen Harris