奧運主辦單位會派安全套並唔係咩新鮮事，上屆里約奧運就派出破記錄45萬個安全套，美國游泳健將Ryan Lochte亦曾表示大約7成選手會喺比賽期間發生性行為。今年東奧都唔例外，據日媒《Tokyo sports》報導，東京奧組委決定允許運動員攜帶酒精飲料進入選手村，同時會派發15萬個安全套，不過強調今年防疫優先，叫運動員拎返祖國先好用，當成紀念品。

從1988年首爾奧運開始，主辦單位喺選手村派安全套已成慣例，等一班身壯力健嘅運動員釋放過剩精力同時做足安全措施，降低性疾病傳播風險。但由於日本疫情仍未受控，東奧如期舉行已經引嚟唔少反對聲音，依家又宣布派安全套同容許運動員飲酒，令民眾擔心選手村會出現大規模集體感染。

東京選手村房間。（圖片截自：japantimes）

東京奧組委堅稱選手村房間分配遵從社交距離原則，強調派安全套嘅目的並非要運動員於村內使用，而係提升性病預防意識，等選手們帶回祖國使用。委員會亦表示正研究緊具體分發程序，意味著堆安全套可能等到奧運結束先派畀選手，到時就真係變成紀念品咁派。不過有民眾就質疑，如果唔係畀選手係村內使用，咁點解一開始要派呢？大家又點睇呢？

資料來源：Tokyo sports、TIME