因為「Error流忍者」，所以早排「忍者」又再次成為熱門話題，不過喺忍術嘅發源地日本，忍術其實係瀕臨失傳嘅傳統技藝，「甲賀伴黨」第二十一代掌門人、現年七十幾歲嘅川上仁一先生，更曾於2012年公開指「忍術不適合現代生活」，所以拒絕再收徒弟。不過隨住近年「日本忍者協議會」嘅成立、三重大學開設「忍道課」、忍者協議會Youtube吸引大量外國觀眾等事件，川上先生就改變心意，目前更於Kickstarter集資，希望能夠創辦世界第一個忍道線上學院。

據忍者協議會嘅Kickstarter眾籌頁面介紹，忍道線上學院會由川上先生擔任校長並親自教授，而課程就會以江戶時代傳承落黎嘅忍術書為藍本，具體黎講會再分成學習忍者歷史與精神嘅「陽忍」，以及學習忍術、防衛術嘅「陰忍」。課程會分為十個階段，完成第一階段就係下忍，完成十個階段就算係「Master of Ninja」。

特別要留意嘅係，川上老師指「忍道線上學院」唔係要訓練學生成為「忍者」，而係希望將忍道發展成類似《孫子兵法》一樣，於現代都能搵到應用空間嘅知識，所以武術並非主要學習內容。

忍者協議會嘅目標係於今年內眾籌到600萬Yen，而四月至今就籌到100萬Yen多啲，情況未算樂觀。如果大家都有興趣嘅話，最平資助3000Yen (約HK$212)就可以獲得首年免費課程。