繼《新・福音戰士劇場版：||》主題曲「One Last Kiss」後，日本天后宇多田光再次出動，為春季新番動畫《給不滅的你》獻唱主題曲「PINK BLOOD」。今次MV更搵嚟曾獲國際大獎嘅谷川英司執導，營造出浪漫而孤獨氣氛。

宇多田光1999年推出嘅首張專輯《First Love》，至今仍然係日本史上最暢銷唱片，全球累計賣出共1,100萬張，成功奠定日本樂壇天后地位。但現年38歲嘅宇多田光從未因此而自滿，多年嚟一直追求音樂上嘅突破，2016年復出後就陸續推出多首單曲，最近亦為電影《：||》獻唱主題曲，而佢嘅最新作品「PINK BLOOD」MV亦係今日正式公開。

由於今次係宇多田光首次為電視動畫獻唱主題曲，所以合作消息傳出嗰陣已經引起唔少迴響，歌迷們都非常期待佢會點樣演繹呢首歌。比起對上兩部MV，雖然今次總算叫做多返幾個Dancer，但整體依然充滿狐獨感，呼應返《給不滅的你》故事主題，概嘆人與人之間嘅變幻無常。