每當提起最成功嘅漫改真人版電影，相信大部份人都會諗起《死亡筆記》，由藤原龍也及松山研一所飾演嘅夜神月同L深入民心，加上精彩絕倫嘅鬥智情節，多年嚟深受廣大影迷喜愛。時隔15年，呢對經典組合再次同框，共同出演日本漫畫家筒井哲也作品《noise》真人版電影，預計2022年上映。

原著《noise（ノイズ）》出自日本漫畫家筒井哲也手筆，2017年起於集英社漫畫雜誌《Grand Jump》開始連載，共有3本單行本。據日媒《ファミ通》今次電影對原著背景設定做咗少少改編，劇情講述一個名為猪狩島嘅孤島，面臨人口老化及勞動力外流問題，但島上村民就因為種植一種名為「黑無花果」嘅植物而獲得豐厚收入，而主角「泉圭太」（藤原龍也飾）就係其一位黑無花果農場經營者。

可惜有日一位名為「小御阪睦雄」嘅男人登島，從此打破小島平靜生活，佢可疑嘅行徑引起「泉圭太」同青梅竹馬老友「田邊純」（松山研一飾）以及警察新人「守屋真一郎」注意，三人喺調查期間唔小心殺死咗「小御阪睦雄」，為咗小島以及屋企人將來，三人決定隱滿事情。但佢哋點都估唔到，原來「小御阪睦雄」係一位前殺人犯，警察為咗追蹤佢嘅行蹤，紛紛趕到島上...

據電影官網資料，目前只知道電影由廣木隆一執導，片岡翔擔任編劇，並未公開更多演員名單，但相信好快就會有更多消息流出，有興趣嘅朋友請密切留意。

資料來源：ファミ通、noisemoviejp