鬼才導演Quentin Tarantino（昆頓塔倫天奴）一向以暴力美學及黑色幽默風格聞名，佢嘅得意之作《Pulp Fiction（危險人物）》以及《Kill Bill（標殺令）》更加係經典中嘅經典，就連周星馳都多次喺電影入面向呢位大師致敬。Quentin Tarantino曾經多次公開表示「拍完十部電影就會退休」，只要數下手指，就會發現佢上一部電影《Once Upon a Time in Hollywood（從前，有個荷里活）》已經係第九部作品，唔少影迷都好期待佢嘅「封鏡之作」。不過佢最近就透露打算唔再拍新戲，因為怕會似其他導演一世英名，最後拍套爛片「臨尾香」。

近日Quentin Tarantino接受節目Pure Cinema Podcast訪問時表示：「大部份人最後一部電影都好差，呢種情況經常發生喺好多『黃金年代（10-60年代）』導演身上，另外有部份『新荷里活年代（60-80年代）』導演都發生過類似嘅事。」佢更以曾獲三次奧斯卡最佳導演嘅Arthur Penn最後作品《Penn & Teller Get Killed》佐證，指出唔少名導都有「臨尾香」嘅情況。

Quentin Tarantino眼見上一部電影《Once Upon a Time in Hollywood（從前，有個荷里活）》叫好又叫座，以9,600萬美元成本斬獲3.74億美元票房，更入圍10項奧斯卡提名，劇中男演員Brad Pitt（畢·彼特）更憑電影獲得奧斯卡最佳男配角殊榮，所以就打算「見好就收」，用呢部作品為導演生涯畫上完美句號。

不過，即使Quentin Tarantino暗示唔再拍新電影，但都唔代表會完全退休，佢現時更加專注喺寫作工作，《Once Upon a Time in Hollywood》衍生小說亦將於6月底上架。相信只要佢諗到好嘅故事，都會兌現承諾拍埋第10部電影。唔知大家聽到呢單新聞，又會諗起有邊個導演嘅作品愈拍愈爛呢？

周星馳曾喺《百變星君》致敬《Pulp Fiction（危險人物）》跳舞一幕。