距離王家衛上一部執導作品《一代宗師》將近8年，不過對於熟悉王大導嘅影迷嚟講，其實唔算係一個好長嘅時間（《一代宗師》都用咗10年啦）。近日由佢擔任監製及總導演嘅新作《繁花》終於曝光首條預告片，短短68秒就講出幾句王家衛式對白。

If you have a chance to restart your life, would you make the same choices? ????

Stay Tuned for "Blossoms Shanghai" on #WeTV ????‍♀️

Stars #HuGe #胡歌 #繁花 #WeTVAlwaysMore pic.twitter.com/aplSp8QFT9

— WeTV.Official (@WeTVOfficial) June 7, 2021

從預告片可以睇到，無論攝影風格定係台詞都充滿王家衛風格，短短68秒嘅預告就整咗幾句台詞畀大家嘆下，胡歌嘅旁白更令人諗起《重慶森林》金城武嘅內心獨白，當然亦唔少得有王大導嘅慢快門式拍攝手法。

《繁花》改編至上海作家金宇澄同名小說，背景設定喺60-90年代上海，以兩條故事線交織而成，全書以上海話寫成。今次劇集版搵嚟秦雯撰寫劇本、《臥虎藏龍》嘅鮑德熹擔任攝影，並由中國人氣古裝演員胡歌主演。劇情講述一位叫阿寶（胡歌飾）嘅年輕人，點樣喺發展蓬勃嘅90年代上海力爭上游，從阿寶一步又一步咁攀到成為「寶總」，同時亦會提到佢同另外四名女子之間嘅感情瓜葛。

據了解，《繁花》從2014年開始籌備，為求呈現出昔日繁華嘅上海，大灑金錢搭建1:1實景片場，無論大至轎車、小至商店Logo都全面複刻。