數數手指，大家都戴咗成年幾口罩，口罩款式亦愈出愈多，五顏六色乜嘢花款都有。最近日本就有間創意公司同麵包店「Melon de melon」合作，推出世上首個可食用「蜜瓜包口罩」，並經過第三方機構測試，保證能夠防飛沫。等大家戴口罩都可以聞到香濃嘅麵包味，肚餓嗰陣仲可以偷偷哋咬返幾啖，不過官方就特別提醒用家外露部份可能會沾上細菌，要食就食裡面。

據了解，呢件創意產品係源於福岡及沖繩3名大學生嘅訴求，佢哋3位除咗鍾意食麵包，更希望可以擁有一款蜜瓜包味口罩。於是創意公司「悟空のきもち THE LABO」就聯同麵包店「Melon de melon」製作出號稱世上最幸福兼可食用嘅「蜜瓜包口罩」。

雖然呢款口罩睇落好「流」，就好似將一個蜜瓜包中間挖空，再綁兩條繩咁求奇，但官方表示口罩已經過第三方機構測試，確保有效防飛沫，用家可以放心使用及食用。不過考慮到外露部份會沾上細菌，官方就強調外面部份不可食用。5個售價為1,800日圓（約$120港幣），全程採用冷凍配送，確保個口罩唔會未用就變壞，6月10起官網開放訂購。

資料來源：prtimes.jp、the labo