由Seth MacFarlane執導兼扮演玩具熊Ted嘅爆笑電影《Ted（賤熊 30）》曾風靡一時，以5,000萬美元成本全球大收5.49億美元票房，至今仍然係史上最賣座限制級喜劇，可惜續集《Ted 2 （賤熊2）》票戶慘遭滑鐵盧，環球影業就冇打算再拍續集。不過最近就有好消息傳出，呢隻抵死嘅玩具熊有機會轉戰串流平台，以劇集形式重出江湖！

眼見串流平台市場商機滿滿，近年各大片商同電視台都推出自家平台加入競爭，Disney+就憑著自家多個經典IP，推出唔夠兩年就突破1億訂閱用戶，HBO上年推出嘅HBO Max亦緊追其後。為求以最快速度脫穎而出，各平台都會選擇以自家王牌IP重新製作全新影集，例如HBO近年就開拍《Game of Thrones（權力遊戲）》前傳，Disney+就有《Star Wars》衍生劇《The Mandalorian（曼達洛人）》等等，而《Ted》呢套咁成功嘅爆笑喜劇，當然獲得環球再次青睞。

玩具熊Ted由導演Seth MacFarlane透過動作捕捉技術親自演出。（圖片截自：youtube）

據外媒《Deadline》報導，《Ted》將會轉戰到NBC環球集團旗下串流平台Peacock，以劇集形式重出江湖，導演兼透過動作捕捉扮演玩具熊Ted嘅Seth MacFarlane目前就傾緊合作細節，不過就未知電影男主角Mark Wahlberg，以及兩位女主角Mila Kunis及Amanda Seyfried會唔會回歸，否則套新作好可能會定位成前傳劇集，講述男主角John Bennett同玩具熊Ted嘅童年故事。

資料來源：Deadline、Variety