運動員之所以會成功，除咗有過人嘅天賦之外，好大程度係歸功於個人自律。日前代表葡萄牙出戰匈牙利嘅超級球星C朗拿度（Cristiano Ronaldo），就喺賽前記招「黑面」將眼前兩支贊助商可樂移開，並拎起樽裝礦泉水講出一句「Agua（水）」，呼籲大家飲多啲水。據了解，雖然支水都係可口可樂公司提供，但呢番舉動就導致公司一度蒸發40億美元。

Do NOT put Coca Cola in front of Cristiano Ronaldo ????

This is absolutely brilliant ???? pic.twitter.com/bw9FYlTOI4

— Goal (@goal) June 15, 2021

雖然股價受眾多因素影響，未必完全關C朗事，但可口可樂公司眼見股價從開盤時嘅56.1美元跌至55.2美元（跌幅1.6%），隨即喺記招結束後發聲明補鑊，表示「所有人都有各自嘅飲品喜好。」強調每個人都有自己嘅口味同需要，記招上亦有提供健怡可樂同埋清水。

多得老豆嚴格訓練，「小C朗」Cristiano Ronaldo Jr.人仔細細就好Fit。（圖片截自：cristiano@instagram）

今年36歲嘅C朗出咗名超級自律，每日都會健身鍛鍊同早睡早起，並且嚴格控制飲食，每日至少食6餐，多水果蔬菜及蛋白質，盡量避免含糖食物，所以又唔怪得C朗見到可樂就好似見到毒品一樣，即刻「黑面」將佢移開。佢早前亦分享過自己嘅「教仔經」，表示每次見到阿仔飲可樂同食薯片就會扯火，有時候仲會叫阿仔學佢跑完步要浸凍水恢復體能，但阿仔都會埋怨啲水太凍，可見C朗除咗自律之外，對現時效力祖雲達斯青年軍嘅小C朗都一樣嚴格。

資料來源：dailymail