早前武打巨星甄子丹加盟《John Wick 4》消息震撼影壇，唔少人都好奇電影公司點解會搵佢扮演Keanu Reeves老友攜手抗敵。近日甄子丹喺第24屆上海國際電影節大談從影生涯種種經歷，其中就提到加盟《John Wick 4》過程及條件，表示每次接拍西片嗰陣，都覺得係一個機會畀全世界見識到中國演員嘅魅力，並且會確認對方尊重中國文化先肯出演，希望利用自己影響力，消除刻板印象。言下之意，係咪代表套戲一定唔會有辱華情況出現，能夠順利通過中國審查，香港亦可以上映？

有網民貼出甄子丹棄美籍改回中國籍言論。（圖片截自：微博）

甄子丹愛國言論傳出後，隨即得到微博網民同中國傳媒讚好及支持，有人更搵翻甄子丹放棄美籍改回中國籍嘅事嚟大力讚揚，表示佢係實實在在愛國嘅中國人，清楚身體入面流著咩血。見到甄子丹咁愛國，就令微博網民諗起另一位知名影星梁朝偉喺《尚氣與十環幫傳奇》扮演辱華角色「滿大人/文武」，於是就喺留言區諷刺梁朝偉，叫佢應該學下甄子丹。

不過都有人覺得佢為咗賺錢先咁講，如果真愛國當初就唔會接拍《花木蘭》，但持開放態度嘅人就覺得唔理佢真定假愛國，敢公開表態就值得尊重。順帶一提，《John Wick 4》將於今年夏天開拍，並喺法國、德國及日本多地取景，預計2022年5月27日上映。

資料來源：新浪財經、微博