Sony月頭發佈全新入耳式降噪耳機WF-1000XM4，進入第四代可謂顛覆之前三代能力更上一層樓。無論係任何方面都變得更強大好用，如果大家想購買最好嘅入耳降噪耳機，你可以當佢係全新充滿黑科技的選項，睇得出Sony好用心研發甚至連包裝都特別選用竹、甘蔗纖維及再生紙環保材料。又研發專用耳棉，優化強大手機App功能。WF-1000XM4特點係強大晶片優質降噪出色通話智能Speak-to-Chat，音樂好聲LDAC解碼，功能已係市場上最強大，聲音老實講試用過個人認為係頭五強內未係最靚聲但都相當好聲，價格自然要對應層次以最高端對手作比較，出得起錢想買入耳式降噪耳機WF-1000XM4必列旗艦之選，唔信可入來睇我詳細評論！

首先聲明我係上一代WF-1000XM3的用家，第三代的Sony降噪耳機其實已經好好用，當然佢有幾個限制同弱點，包括體積同充電盒都較大、並唔特別防水故使用上要較為小心、風噪聲較大，比較適合都市同室內應用並不適合戶外跑步使用。不過其實如今Sony依然出售緊WF-1000XM3，如果Sony會將價錢減低個人認為即使係第三代的WF-1000XM3至今依然非常好用同吸引，想平時搭車通勤都市應用降噪耳機其實用第三代都非常夠用，第三代依然會係現今入耳式降噪耳機的高階好選擇。

咁第四代又有咩野唔同，其實唔同的地方相當之多，甚至可謂已經脫胎換骨。如果同一個價錢當然買第四代！注意一點，選擇Sony其實係選擇一個品牌一個高階入耳式降噪耳機。但凡認為太貴或頭載式更舒服好聲、甚至有線耳機最好聲等等智者可以省略全文！WF-1000XM4主要的對手應該係Bose QuietComfort消噪耳機、 Sennheiser Momentum True Wireless 2、Fender TOUR耳機、同蘋果粉絲專用的Apple AirPods Pro等等。

相信所有人得到呢個WF-1000XM4第一印象係包裝盒非常別緻，相比起過去或其他品牌，今次Sony的包裝好靚好細小，廠方話使用左竹子、甘蔗纖維及再生紙研發環保紙質材料Sony Original Blended Material用作無染色的包裝原料，傳遞環境意識。當然用最Mean想法Sony咁大的企業先做到或做好呢種環保領先不計成本的作風。老實個盒真幾靚！然後打開就發覺新的耳機已經支援無線充電，只要放落Qi 充電板甚至部份原廠Sony手機可以反向無線充電，感覺新穎。 新第四代耳機一眼可見充電盒相比過去細左好多，充電盒容量好像少左，不過耳機的電池壽命實際上更長。如果降噪和藍牙全開耳機可以連續使用8小時。再加上充電盒可以再提供 16 小時的充電時間。以降噪耳機同級水平比較其實已經優勝於其他競爭對手。如果你唔用降噪功能甚至可以連續用12小時，我當然唔會唔開降噪咁傻！

使用之前首先同第三代一樣大家要先安裝Sony的Headphones Connect 應用程式，呢個係非安裝不可，其中原因係功能實在太強大好用。最簡單耳機同充電盒的剩餘電力一目了然。據說充電盒電量低過30%佢會手機提醒你叉電！所以電量同應用軟件應該係同級優勢。讓您可以直接了解設定耳機的所有主要特性和功能，以便您選擇啟用和禁用每個功能。甚至軟件可以測試現時所用耳塞的氣密情況。利用軟件配合耳機內的咪高風，與耳機外咪高風比對，選擇最適合你大小的耳塞。

由於耳機本體變得更細小輕便，所以WF-1000XM4配合人體工學，展示更加圓潤的機身，更貼合耳孔內部。舒適度大大加強，簡單講我連續戴足三日，使用上完全無感忘卻耳機的存在。所以舒適性可謂大大加強，好評十足。廠方話此耳機擁有IPX4防水等級，如今落雨流汗完全唔再有顧慮。對耳塞係Sony專門特製，日後將會公開發售。老實呢個耳塞功能同舒適都好好，但耐用性有待考証。耳機雖然細小但使用操作方便有個圓形觸控面，可以進行各種操控。值得一提此耳機首次係真無線耳機層面啟用 Speak-to-Chat 功能。此功能允許用家帶住耳機時與人通話，當耳機聽到你開口講野時佢就會停音樂並還原環境聲音，讓你一邊使用一邊同人互動交流無障礙毋需動手。當然你都可以用過去Sony耳機手動方式將手放面板短暫停歌與人溝通！Speak-to-Chat 應用會係用家開始講話後一秒鐘左右觸發。如果你係一路聽歌一路跟住唱歌的可以降低相關功能的靈敏度甚至關閉Speak-to-Chat 功能！手動Quick Attention 或完全移除耳機都一樣可以作自動暫停播放。

WF-1000XM4本身的強大在於其使用全新 Sony 研發的 Integrated Processor V1 晶片。晶片將 XM3 代的藍牙音訊晶片與降噪晶片 QN1e 二合之一，正因為呢個強大晶片完美提升降噪的處理效能提供更清晰的聲音，更加令到耳機可以變得更加細小，以及消耗更少電力。V1 晶片進一步提升降噪功能，尤其喺中銀同高頻噪音方面效果非常顯著，無論係搭地鐵定座小巴大巴 ，明顯比過去變得更寧靜。過去第三代有人詬病話戶外風切聲明顯，影響聲音效能， 如今代廠方特別作出改善，據知咪高風位置已重新配置，並加入屏障，務求物理上令風聲更難進入耳機，而手機 App 更有一個消減風聲功能，的確大大改革呢個弱點。題外話，耳機仲有一個尋找裝置的有趣功能，係手機Apps按下耳機就會發出聲音，可以有助於搵返一時唔見左的耳機！

另一個重點係通話質素，Sony今次有全新波束成形設計、精確語音拾音技術和使用強大的耳骨傳導感應器加強提供更清晰的通話，可以防止咪高峰係用家說野時收錯雜聲影響通話。此外，還有上面提過自動抑制風噪功能，成功抑制外部噪音和干擾，讓對話另一方可以輕易辨識用家講話內容。我的實驗好簡單如果你係任何測試環境打電話畀另一半同打電話畀媽媽都可以完美溝通對方非常滿意你的對話聲音質素，呢個就係強大的通話質素，呢點我證實WF-1000XM4完美通過！聽歌的質素同樣強大，不過好唔好聲就見仁見智畢竟呢個是調音的功力，但Sony係支援自己再調較！WF-1000XM4具有改進的類比擴大器，Sony聲稱可提供比清晰靚聲。試用中完全唔係問題，高中低音都清晰動聽。耳機配備DSEE Extreme音頻處理器同埋Edge-AI，呢個功能可以將低解析音樂檔案升級到接近高解析的質量。最後，呢對耳機的缺點係唔支援支援aptX HD，不過Sony的LDAC解碼器就為Android手機用家提供更強大的聲音，可以高達 990kbps 的速率傳輸高達24位元/96kHz的高解析聲音。

總結如果你想搵一對隔音效果出色同時聲音有好嘅耳機，你會非常喜歡WF-1000XM4，佢嘅新設計同新功能都無與倫比。暫時又再一次成為降噪耳機嘅新旗艦之選！你問佢係唔係最抵用嘅耳機價格上一定唔係！你問我佢係咪我用過最靚聲耳機我答案又一定唔係，你問充電盒係咪最靚最好用的耳機一定唔係！但佢一定係我試過功能最全面各方面最均衡嘅最新型旗艦耳機！