唔知幾時開始，只要電影上有男男組合出現，就好容易被認定與同性戀有關。早前完結嘅Marvel劇集《The Falcon and the Winter Soldier》亦唔例外，即使導演Kari Skogland表示過二人唔係同性戀組合，但仍然有唔少粉絲猜測佢哋將會發展出同性戀情。近日Falcon演員Anthony Mackie接受外媒Variety訪問時就開腔否認傳聞，並認為現今同性戀議題被過度利用及剝削，兩個男人行得埋少少就被人話同性戀，強調二人只係互相扶持嘅兄弟情。

Falcon演員Anthony Mackie於訪問中表示，好多故事都遭到扭曲及複雜化，大家都鐘意用自己嘅方式解讀好多嘢，並加以合理化。由於同性戀議題被過度利用及剝削，2個男人成為朋友並互相愛慕喺2021年竟然成為一個問題。以前男性之間可以成為朋友，一齊去酒吧玩，very cool，但依家好似唔可以咁做，因為大家都濫用美好而純潔嘅同性戀解讀及合理化自己想睇到嘅嘢。

Anthony Mackie繼續表示，我只係希望可以營造出一個充滿男子氣概又感性嘅形象，冇嘢比成為超級英雄飛嚟飛去痛毆敵人更有男子氣概，同時亦冇嘢比同一個志趣相投嘅朋友展開深度對話更感性。Falcon同Winter Soldier二人只係互相接受及欣賞彼此，你可以話呢種叫做「基情（bromance）」，但實際上只係兩個老友互相扶持嘅兄弟情。

其實Anthony Mackie呢段說話並唔係歧視同性戀，而係覺得男性之間都有純友誼，男人都可以有男人氣概及感性一面，覺得咩都解讀成同性戀係濫用同性戀議題。不過有粉絲就唔認同佢諷刺人哋咩都解讀同性戀呢種講法，繼而喺社交媒體留言炮轟佢。唔知各位男士又有無體悟，當同兄弟親密少少，就會被人話係Gay，事實上大家只係手足情深呢？