先前同大家報導過，堅持「一生只拍十部電影」嘅鬼才名導Quentin Tarantino，早排放風表示為咗導演生涯唔好「臨尾香」，諗唔到好戲就會索性唔拍第十部直接退休，搞到唔少影迷都既認同又失望。近日Quentin Tarantino上Talk Show節目宣傳新書《Once Upon a Time in Hollywood（從前，有個荷里活）》嗰陣就爆料，原來佢曾經打算重拍《Reservoir Dogs（落水狗）》做封鏡之作，不過就強調只係一瞬即逝嘅諗法，並唔係真係要拍。

Quentin Tarantino經典之作《Reservoir Dogs（落水狗）》。（圖片截自：IMDB）

堅持「一生只拍十部電影」嘅Quentin Tarantino早前喺節目Pure Cinema Podcast透露，大部份名導最後一部電影都好差（即「臨尾香」），呢種情況經常發生喺「黃金年代（10-60年代）」嘅導演身上，更以曾獲三次奧斯卡最佳導演嘅Arthur Penn最後作品《Penn & Teller Get Killed》做例子佐證。加上眼見第九部電影《Once Upon a Time in Hollywood》叫好又叫座，所以佢打算「見好就收」擺脫「魔咒」，用呢部作品為導演生涯畫上完美句號，搞到唔少影迷都既認同又失望。

為宣傳小說版《Once Upon a Time in Hollywood》上架，日前Quentin Tarantino就上Talk Show節目《Real Time With Bill Maher》接受主持人Bill Maher訪問。期間Bill Maher再次問起QT嘅退休大計，表示名導Clinton Eastwood喺晚年都可以拍出《Gran Torino（驅·逐）》呢部出色作品，鼓勵QT應該繼續拍埋第十部電影。另外又表示導演功力會愈拍愈爐火純青，借機問QT如果重拍處女作《Reservoir Dogs（落水狗）》會唔會有更好嘅表現。點知呢個時候QT就大爆「我確實有諗過最後一部電影就係重拍《Reservoir Dogs（落水狗）》」，不過佢好快就意識到呢句說話會被大肆宣傳，於事即刻強調「網民們，我只係有考慮過，並唔係真係要拍！」雖然QT冇落實開拍，但相信影迷們聽到呢句說話都會非常興奮，重拍《Reservoir Dogs（落水狗）》做封鏡之作，未賞唔係一個好選擇，當然前提係要拍得比原版好睇同埋有突破，唔係單純嘅重拍一次。

鬼才導演Quentin Tarantino一向以暴力美學及黑色幽默風格聞名，歷年嚟拍過《Pulp Fiction（危險人物）》、《Kill Bill（標殺令）》等深入民心作品，而出道之作《Reservoir Dogs（落水狗）》更加係經典中嘅經典，就算依家睇返都唔會覺得過時。

資料來源：NME