日本東京富士急遊樂場最出名嘅，就係入面有好多刺激、恐怖、令人腎上腺爆錶嘅遊玩設施，成個遊樂場最唔恐怖嘅大概就係佢個「閃亮之星」摩天輪。或者就係嫌佢唔夠刺激，所以富士急就為閃亮之星換上新嘅「車廂」，令呢個老少咸宜、人畜無害嘅犘天輪恐怖程序急升。

所謂新嘅「車廂」，其實就係一個完全由鐵枝組成嘅「鐵籠」，每個鐵籠可以容納兩名「犯人」，進入之後就會於幾乎無遮無掩嘅情況之下進行全長11分鐘嘅旅程，最高升到50m高空。據富士急嘅公告，遊客可以進入新車廂、坐喺長櫈之上，面向富士山懺悔過去所做嘅壞事，亦可以當係朋友之間懲罰。我就覺得佢非常適合做下一輯《花姐Error遊》嘅環節之一。

鐵籠車廂同普通車廂一樣都係800Yen，不過要留意嘅係成個摩天輪得兩個同款車廂，所以如果你一定要坐佢嘅話就可能要等耐啲。另外同一個摩天輪上仲有4個用全玻璃製成嘅車廂，官網話好適合情侶去坐，感受一下心跳嘅感覺。

資料來源：富士急