相信大家睇科幻電影同動漫嗰陣，都見過唔少識飛嘅汽車，幻想有一日自己都可以揸住部車遨遊天際！日前斯洛伐克科技公司Klein Vision所研發嘅飛行汽車「AirCar」就完成首次跨城飛行測試，用咗35分鐘從斯洛伐克西部城市Nitra飛至首都Bratislava。

「AirCar」係一款能夠隨時變形嘅交通工具，既係跑車又係飛機，喺汽車模式下撳個掣就可以喺3分鐘之內「變身」成飛機，反之亦然。根據研發者Stefan Klein所講，「AirCar」搭載一副160匹制BMW燃油引擎，目前已完成近40小時試飛，當中包括45度急轉彎，穩定及機動性測試，最高可以飛到2,500米高空，以時速190km/h巡航，續航力為1000公里，並透露即將研發嘅第二代原型車會更快，時速可達300km/h。

可惜嘅係，呢部車就只可以坐兩個人，而且唔能夠垂直起飛，要好似飛機咁用跑道起飛。不過總算向「飛車」夢想邁進一大步，接住落嚟要面對嘅就係量產同各種航空法規嘅問題。

資料來源：klein vision、bbc