玩開Lego嘅朋友都會儲儲埋埋唔少散件，有時候想砌啲新嘢玩，但見一堆積木又無從入手，十分之頭痕。最近有班LEGO粉絲就整咗個App，只要對住埋積木影張相，個App就會透過AI掃瞄辨識出各種積木類型，並提供組裝建議，仲會提埋你有咩缺件。

近日開發團隊Brickit推出同名App《Brickit》，就好似示範影片咁樣，大家只要對住埋散件影張相，AI就會掃瞄相中各種積木嘅類型，並提供組裝建議。揀好想砌嘅模型之後，就會顯示出組裝說明書，同時例出所需組件，以及粒積木嘅具體位置。不過目前只支援iOS平台，開發團隊就表示Android版本有望於今年秋季推出。

不過組裝建議入面多數只係用上幾十至百幾粒積木嘅小品模型，亦冇LEGO官方模型（好正常，因為版權問題），而開發者都喺App Store說明欄強調團隊只係Lego粉絲，並非隸屬LEGO公司。唯有希望LEGO公司見到呢個App之後都會考慮出返個官方版本，咁樣各位Lego迷嘅散件就可以再利用啦！