我摯樂近日有幸一試日本牌子 AVIOT 最新真無線藍芽耳機TE-BD21j，由最初的懷疑到心悅誠服，日系其實係耳機中係同歐美抗衡自成一國的獨立世界。AVIOT今次呢粒BD21j獲得日本VGP2021 Lifestyle 大賞，用落的確係一個非常高質素聲靚穩定功能恰到好處的耳機。呢粒耳機非動鐵非動圈而係少數二鐵一圈單元組合，其聲音好有趣煲練需時層層日日變聲，係一對極有個性的藍牙V5.2耳機，其個性還在於用家要適應佢玩法，包括其個性獨特趟門設計耳機盒子，靚仔有型但超越人體工學磁吸設計耳機一開始好難放入取出，習慣到就愛不釋手。如果大家有興趣入真無線藍芽耳機，芸芸大牌子中絕對要留意考慮埋 AVIOT，大家入來我詳細講講AVIOT TE-BD21j的優點與其少少缺點，以方便你入手前最後檢閱。

AVIOT呢個日系品牌早前已經推出過非常高質量口碑良好的耳機TE-BD21f，今年AVIOT繼續改進推出後續混合三單元真無線耳機–TE-BD21j。其實我未用過前作TE-BD21f，所以口碑於我無用。我會將新作TE-BD21j同我用緊或用過覺得最好聲的耳機包括Fender同Sony比較作標淮。

從一開始吸引我眼球的係宣傳中的二鐵一圈單元組合，話說配合PET鈦複合振膜，講到非常好聲般。老實講我第一耳開機戴上開機一聽，嚇一大跳，又蒙又焗簡直係我耳邊唱蒙著嘴說愛你咁。堅蒙！廠方特別提醒要時間煲聲，為發揮更高性能的三重混合驅動程序。AVIOT建議先將耳機運作至少30-50小時，只須將耳機調到適當的音量（約為最大音量的50-60％）播放具有寬頻率範圍和低聲壓（例如白噪聲）的聲音。完成後，您將體驗到無與倫比的聲音體驗。我因此連續開聲煲左三日一路開住聽歌玩到無電又叉返再播。聲音果然日日唔同，到第四日返工我一個人係巴士笑出來，原來玩這些擺明唔係最好聲的藍芽耳機煲練都咁重要！ AVIOT 的聲音中高音特別好聲，聲音細膩得來好有層次，有唔誇張但分明的音場，我特別鐘意佢女聲，其低頻唔算非常強但可以給予像聽鋼琴應有的低頻墊底量感，可能這些就叫音樂感！

講返廠方所示的單元設計TE-BD21j繼續配備三個混合單元。動態單元使用超輕，高鋼度的PET鈦複合膜片，直徑稍小，以提高響應速度。同時，AVIOT的工程師將耳機進行長時間的聆聽測試，並仔細選擇在調音台上進行調音。以最大程度地減少了交叉頻帶的失真感，同時增加了中高頻段的信息量。此外，為了消除影響聲場等的相位移動，AVIOT運用高級聲學技術，在PCB上開一個導管孔，並在耳機上的每個單元進行最佳佈置，為0.01毫米。耳機採用最新編碼aptX™ Adaptive，我用來播放Neflix影片以及打機起碼無發覺有任何低延遲性能障礙。

選擇藍芽耳機其中一個重點在於通話，一個好的耳機至少需要能夠係巴士同小巴上成功全程同女友對話通電不被投訴才合格。老老實實一般的藍芽耳機好難完美達標。對方總係覺得太細聲或聽唔清楚，一或用家需要不自然好大聲嗌住講電話畀全車聽！今回測試基本成功做到話音清晰，清楚傳達，無論自己聽對方到對方聽我聲音都可以好好交流！不過如果係繁忙時間的金鐘轉地鐵逼住人龍的嘈吵車廂內，我就曾經失格被對方投訴聽唔清楚。反而旺角街頭就奇蹟成功完成對話測試！據廠方AVIOT話耳機其中使用高靈敏度的MEMS咪高峰改善通話質量。具有cVc噪聲消除功能的協同效應產生的環境噪聲。轉一轉去講連接性同性能上使用的確好快好順，因為其使用藍芽V5.2優化無線連接，晶片就使用最新高通的SoC，QCC3040晶片。呢個晶片有一個好處，較為省電讓耳機的播放時間好長，可能佢唔似大品牌的降噪耳機有降噪食電功能，我爆足9個鐘真係聽到盡，用落係我需要休息停多過佢無電逼我停，除左強行煲耳機，你無咩可能聽到佢無電為止。據講搭配充電盒續航力可高達45小時。

耳機仲有個最新設計薄膜式天線與Qualcomm TrueWireless™ Mirroring之間的加乘作用，即使係無數訊號干擾交錯的嚴峻環境中，左右兩側訊號，隨時進行滾動交換，以防止音頻訊號傳輸損失，無論身在何處，都可以不間斷享受聆聽音樂的舒適感。特別一提有個功能相當好用有趣，之前我無預期呢隻耳機畀到我！叫做捕捉周圍聲音的環境音咪高峰功能。當我努力試機時手一按實右耳機就會進入環境音功能，所有週圍聲音會放送入我耳機中，因為耳機搭載能擷取周遭聲音的環境收音咪高峰（ambient microphone）。呢個相當好用，一開音樂聲會調細並聽到週圍聲音包括放大打字聲其他人聲等等聲聲入耳，起碼可以完美同身邊人例如收銀員溝通到唔駛除耳機！有電話都可以輕輕一按，就可以順利接聽。

另外我一路都幾睇少耳機的app對應軟件，但呢個AVIOT對應AVIOT SOUND XXXapp 軟體非常好用，除左可針對音質及功能操作進行個人化設定，其EQ setting的聲音變化之大讓人驚喜，我頭兩個鐘未開聲時就試玩EQ發覺真係可以好大改變成個聲底，幾好玩！至於IPX4等級防水我個人認為無咩特別之處，好耳機防水是應該的！

老老實實等我講下呢隻耳機的一些缺點，個人認為呢個耳機個性太強，唔夠User friendly，佢係需要你去遷就佢！首先其開聲由一般聲音到靚聲時數比較長久，不能一開箱就馬上好聲！遇上無耐性之君可能已經判別死刑！第二佢個耳機盒絕對係缺陷，外型同趟門設計都好好，但放入同取出耳機非常唔方便，而且可能因而容易刮花！你絕對需要時間去適應！最後其耳機上的按鈕非常靈敏，通話或聽歌中唔好多手，一掂到音樂就會暫停、通話更利害會直接Cut線，千萬要適應唔好手多！而佢的設定係只能設定雙擊同三擊tap，即上面我講的掂擊一下係無法以調較按鈕功能方式解決！不過AVIOT確實係我近期試過其中最有趣好玩的真無線耳機，有簡單直接配戴舒適，超級輕巧質感強烈又好聲的好處，以中級價位絕對值得推薦畀需要高質素藍芽耳機的用家！

產品規格 :

Type 種類：全無線耳機

Driver單元：8mm 動圈單元＋雙動鐵單元

Frequency Response 頻率響應：20Hz – 20kHz

Impedance阻抗：32Ω

Sensitivity靈敏度：92 ±3db

Audio codecs supported 支援音訊格式：AAC,SBC,Qualcomm® aptX™ ,Qualcomm® aptX™ Adaptive

Music Playing Time音樂播放時間：9 小時

Earphones Charging Time 耳機充電時間：1.5 小時

黑銀雙色選擇建議零售價 : HK$1,598.00