Emoji種類包羅萬有，適當使用可以令文字溝通增加趣味，但往往就因為冇具體講明每個符號代表緊乜，而引起過多次爭議。最近英國口吃人士協會「STAMMA」發現，當喺iPhone或iPad輸入「Stammering（口吃）」嗰陣，建議欄就會彈出一個「頭昏眼花」emoji，認為Apple嘲笑口吃人士，行為極不尊重。

根據「STAMMA」新聞稿，最近有數百位口吃人士聯繫佢哋，表示用iPhone或iPad輸入「Stammering（口吃）」就會彈出「頭昏眼花」emoji，就好似諷刺緊口吃人士平時喺社交場合嘅尷尬表情，並反問如果輸入「disabled （殘疾）」都會彈出一個輪椅emoji，殘疾人士又會有咩諗法。

目前並唔清楚點解會出現呢種情況，因為唔係每一部iPhone或Apple設備會出現呢個emoji，「STAMMA」亦表示已經聯絡Apple要求佢哋更改或唔再顯示「頭昏眼花」emoji。順帶一提，呢個emoji原名叫「woozy face（頭昏眼花）」，大部份人會用嚟表達醉醉地、有啲攰嘅心情。

資料來源：STAMMA、9to5mac