講述「梅姐」梅艷芳一生嘅傳記式電影《梅艷芳》早前公佈由名模王丹妮飾演梅姐，不過首輪公開嘅海報就只係見到佢個背影，到今日公開嘅新海報以及預告，先首次見到王丹妮於戲中嘅造型。唔知大家又滿唔滿意？

短短35秒嘅新預告其實係冇講到任何電影劇情，主要就係由王丹妮重新演繹梅姐嘅《胭脂扣》、《風的季節》、《夕陽之歌》、《烈焰紅唇》等經典造型，驟眼睇的確有幾分梅姐嘅影子，除咗王丹妮嘅表現之外，服裝及美術亦應記一功。電影公司亦引述王丹妮嘅自白：「我不是梅艷芳，但我希望盡自己能力做到最好，作為對梅姐的一份至深敬意。」暫時未知以上造型會否於電影中出現。

現年31歲嘅王丹妮 (Louise Wong) 原為時裝模特兒，17 歲參加 Elite 模特兒比賽奪冠，再代表香港參加亞太區總選，在36個國家的選手中脫穎而出，成為亞太區總冠軍，正式入行當模特兒。後來又簽約米蘭模特兒公司進軍歐美市場，曾走上 Chanel、Dior 等時裝騷舞台。她亦曾參與陳奕迅《主旋律》MV。而電影《梅艷芳》，則是王丹妮首次登上大銀幕之作。