因疫情而經歷多次延期，《Black Widow》終於喺上禮拜於全球正式上映，除咗係MCU第四階第一部電影之外，同時亦係首部以「電影院」及「Disney+」同步上映嘅MCU電影。截至目前，《Black Widow》共錄得2.15億美元票房，其中有8000萬係北美地區票房，7800萬係國際票房，串流平台Disney+就大收超過6000萬票房，同國際票房有得揮！可見今次迪士尼「同步上映」策略取得大成功，唔排除日後會有更多電影效法。如果大家屋企有大電視同靚音響，又會唔會更偏好喺屋企睇戲呢？

現時串流平台Disney+收費為每月8美元或每年80美元，即可觀看迪士尼旗下N部影視作品，但如果想睇埋迪士尼最新電影（e.g.《Black Widow》），就要一次性咁額外畀多30美元解鎖「Premier Access」，所以就算迪士尼將電影「同步上映」仍可獲得額外收益。

就算訂閱咗Disney+，都要加錢解鎖「Premier Access」先睇到迪士尼最新電影。

本身串流平台收益一向都係神神秘秘，就算串流界一哥Netflix都只係會公開全球用戶數目，但其他數據就守口如瓶，所以外界一直都唔知串流平台有幾大嘅商業價值同潛力。今次迪士尼曝光《Black Widow》Disney+票房，令大眾見識到原來串流平台收益可以力敵實體電影院票房，同時又加上疫情影情，或者會吸引到更片商採用「同步上映」方式發行電影，對影迷嚟講又可以多個選擇。可惜現時Disney+並未支持香港地區，有傳今年內會上架，各位再耐心等下啦。