去酒店Staycation基本上已經成為疫情之下無得飛嘅最佳活動，但你唔好以為去酒店只係住下靚房、去泳池打下卡、去餐廳食好野飲酒Chill下，今個暑假香港朗廷酒店就準備左「遊戲吧！」Esports及VR虛擬體驗，等你喺Staycation又多一樣野可以玩。

香港朗廷酒店今次特意打造四間動感遊戲室，比你走入虛擬電玩世界，感受刺激感觀遊戲新體驗，無論係成人、小朋友、專業電競達人又或者休閒玩家，都一定滿足到你。

Esports電子競技室內設有兩部GT或F1座位嘅賽車模擬遊戲機，令你可以感受一級方程式賽車嘅刺激及快感。

VR虛擬體驗室內則有兩部HTC VIVE 虛擬實境裝置，可以即玩至hit音樂遊戲Beat Saber，以及兩部虛擬實境遊戲專用嘅全方位跑步機模擬器，支援多個熱門虛擬實境遊戲包括Core Defense、Hardpoint、Primordian、Karnage Chronicles等。

任天堂世界派對遊戲室內設有一部75吋大電視，可以比你玩多達40款任天堂遊戲，最多可以四位客人同時遊玩。

復古電子遊戲室，非常適合小朋友大顯身手，挑戰多個復古電子遊戲，好似Space Invaders太空侵略者、Galaga大蜜蜂和NBA JAM。