著名廚師、作家、電視節目主持人Anthony Bourdain離開大家三年有多，唔少人都對呢位才華橫溢又風趣幽默嘅名廚念念不忘。同其他名廚唔一樣，佢除咗夠膽揭露業界各種不為人知嘅祕密，亦經常分享個人處世哲學。與其話佢係飲食節目主持，不如話係一位走遍世界探索各地風土人情嘅旅行者，每句看似尖酸刻薄嘅說話背後都埋藏住細膩情感，引起觀眾反思及細味。隨住個人紀錄片《Roadrunner: A Film About Anthony Bourdain》於今日上映，導演Morgan Neville就向記者分享製作心路歷程以及對Anthony Bourdain嘅印象。

本片由奧斯卡紀錄片得獎名導Morgan Neville操刀，希望透過影像說明Anthony Bourdain點樣從一個寂寂無名嘅廚師變成作家，再成為世界著名文化偶像。從預告片可以見到，Anthony Bourdain備受同行、探訪過嘅居民認可，激勵過無數人走出自己舒適圈。

導演Morgan Neville表示，雖然自己從未見過Anthony Bourdain本人，但就因為參與過一個飲食節目而認識到佢多位好友，發現佢除咗一係位深受歡迎嘅節目主持人，同時亦係備受同行尊敬嘅前輩。不過令導演最驚訝嘅係，佢發現睇落意氣風發又瀟灑嘅Anthony，原來起初係非常怕羞，做咩都冇安全感，有啲冒名頂替症候群（Impostor syndrome）症狀，即係無辦法將自己嘅成就歸功於個人能力，總覺得只係運氣好，深怕有朝一日會變成一個喺Buffet餐廳煎奄列嘅廚師仔。

導演Morgan Neville。

另外Morgan Neville又表示，佢覺得Anthony Bourdain拍節目唔係純粹為咗賺錢，而且佢根據唔缺錢，而係希望展示地球另一端嘅人點樣生活，並激勵佢哋。由於Anthony Bourdain嘅死亡為公眾留下一個巨大問號，所以希望透過今部電影可以為大眾提供一個「答案」，為各位粉絲提供治療。

資料來源：collider、finedininglovers