南韓流行文化近年橫掃全球，就算你對韓國劇、綜藝以至K pop再冇興趣，你都一定知道咩係「Oppa/歐巴」。而北韓領導人當然都知咩係「Oppa」，而且仲覺得呢隻字非常危險，所以最新頒布一系列反南韓流行文化措施，例如禁止人民講「Oppa」，違者要坐監甚至被判死刑。

《Gangnam Style》中就有一句「Oppa Gangnam Style」

據英國《BBC》引述北韓官媒《勞動新聞》報導，北韓近日推出一系列新法例，主要係禁止人民講南韓流行用語、仿傚南韓偶像團體的髮型、說話方式等，強制北韓人民用返以平壤方言為本嘅北韓韓文。而所謂「南韓用語」仲包括「Oppa」(오빠，女性對年紀較大的男性熟人的稱謂，對男朋友以至老公亦可以用)、「男親」(남친，全寫남자 친구，即男朋友) 等韓劇常用稱謂。

假若被發現違法以上法例，北韓人民將面臨監禁甚至死刑。

其實北韓防範南韓文化入侵都唔係咩新鮮事。今年5月時北韓領導人金正恩亦曾下令禁穿緊身或破洞牛仔褲、短裙、染髮、穿環等行為，違者直接送入勞改營。

據BBC北韓大學院大學教授Yang Moo-jin指，由於金正恩曾於瑞士讀書，所以非常明白南韓文化以至西方文化能夠輕易滲入年輕人之中，並對社會主義社會造成負面影響，所以及早下令禁止以防止未來產生更大問題。

資料來源：BBC